Spread the love

[ad_1]

গৃহভূমিতে ৰণত পৰিছে দক্ষিণ আফ্ৰিকা। এক যুৱ খেলুৱৈৰে সমৃদ্ধ ভাৰতীয় দলৰ দুৰন্ত অলৰাউণ্ড প্ৰদৰ্শনত দিশহাৰা হৈ পৰিল প্ৰটিয়াছ বাহিনী। ঘৰুৱা দলটোৰ বিপৰ্যয়ৰ কাৰণ হৈ অৰ্শদীপ-আভেশে কঢ়িয়ালে ভাৰতীয় দললৈ আকাংক্ষিত বিজয়।

টছত জয়ী হৈ দক্ষিণ আফ্ৰিকাৰ অধিনায়ক এইডেন মাৰ্ক্ৰামে সিদ্ধান্ত লৈছিল প্ৰথমে বেটিঙৰ। কিন্তু মাৰ্ক্ৰামৰ এই সিদ্ধান্তক ভুল প্ৰমাণিত কৰি দুৰ্দান্ত হৈ পৰে ভাৰতীয় বলিং আক্ৰমণ। যাৰ পৰিণতিত মাত্ৰ ১১৬ ৰাণতে থমকে প্ৰটিয়াছ বাহিনী।

ইনিংছৰ প্ৰথমটো বলতে মুকেশ কুমাৰে হেণ্ডৰিকচক নিখুঁত লাইনেৰে উইকেট নিশ্চিত কৰিছিল যদিও আম্পায়াৰৰ ভুল সিদ্ধান্তৰ লগতে ভাৰতীয় দলে ৰিভিঅ’ নোলোৱাৰ বাবে ৰক্ষা পৰে হেণ্ডৰিকচ। কিন্তু তেওঁৰ ভাগ্য দীৰ্ঘস্থায়ী নহ’ল।

দ্বিতীয় অভাৰত অৰ্শদীপে ক্ৰমাগত দুটা বলত হেণ্ডৰিকচ আৰু ভান ডাৰ ডুচেনৰ উইকেট দখল কৰি প্ৰটিয়াছ শিবিৰত আঘাত হানে। তৃতীয় উইকেটত আনজন অপেনাৰ টনী ডে ঝৰ্জী আৰু অধিনায়ক মাৰ্ক্ৰামে যোগ দিয়ে ৩৯ ৰাণ।

কিন্তু অৰ্শদীপে ঝৰ্জীক (২৮) বিদায় দি পুনৰ দক্ষিণ আফ্ৰিকাক বেকফুটলৈ ঠেলি দিয়ে। ইয়াৰ পিছতে খহনীয়াৰ আৰম্ভণি হয় দক্ষিণ আফ্ৰিকাৰ বেটিং লাইন আপত। কিছুসময়ৰ পিছতে অৰ্শদীপৰে চিকাৰ হয় ক্লাছেন(৬)।

অৰ্শদীপৰ এই চমকৰ পিছতে আভেশো উঠে চমকি আৰু বিদায় দিয়ে অধিনায়ক মাৰ্ক্ৰামক (১২)। পিছৰটো বলতে আভেশৰ চিকাৰ হয় মুল্ডাৰ হ (০)। দলীয় স্ক’ৰ ৫৮ত মিলাৰ আৰু ৭৩ত মহাৰাজকো বিদায় দিয়ে আভেশে।

ইয়াৰ পিছত অৱশ্যে ফেহলুকুৱায়’ই বাৰ্গাৰক সংগী কৰি দলীয় স্ক’ৰ শতকৰ পাৰ কৰায়। দললৈ সৰ্বাধিক ৩৩ ৰাণৰ অৱদান আহে ফেহলুকুৱায়’ৰ বেটৰ পৰা। অন্তিমটো উইকেটৰ ৰূপত বাৰ্গাৰৰ উইকেট দখল কৰে কুলদীপে।

দক্ষিণ আফ্ৰিকাৰ বিপৰ্যয়ৰ কাৰণ হৈ পৰা অৰ্শদীপে ৫ টা আৰু আভেশে ৪ টা আৰু কুলদীপে এটা উইকেট লাভ কৰে। ইফালে এই সহজ লক্ষ্য অনুসৰণ কৰি প্ৰথমতেই উজুটি খায় ভাৰতে। ব্যৰ্থ হয় ৰুতুৰাজ (৫)।

ইয়াৰ পিছত অৱশ্যে আন্ত:ৰাষ্ট্ৰীয় অভিষেক ঘটোৱা ছাই সুদৰ্শন আৰু শ্ৰেয়স আয়াৰে ভাৰতক জয়ৰ প্ৰায় দুৱাৰডলিত উপনীত কৰায়। আয়াৰে ৫২ ৰাণ কৰি বিদায় ল’লেও অভিষেকতে দৃষ্টি আকৰ্ষণ কৰা সুদৰ্শনে ৫৫ ৰাণ কৰি অপৰাজিত হৈ ৰয়।

সুদৰ্শন আৰু আয়াৰৰ এই মেচ বিজয়ী অৰ্ধশতকীয় ইনিংছৰ সহায়ত ভাৰতে ৮ উইকেটত বিজয় সাব্যস্ত কৰি তিনিখনীয়া মেচৰ শৃংখলাটোত ১-০ৰ অগ্ৰগতি লাভ কৰে। দুৰন্ত বলিং প্ৰদৰ্শনৰ সুবাদত অৰ্শদীপ মেচৰ শ্ৰেষ্ঠ বিবেচিত হয়।

শৃংখলাৰ দ্বিতীয় আৰু তৃতীয় তথা অন্তিম এদিনীয়া অহা ১৯ ডিচেম্বৰ আৰু ২১ ডিচেম্বৰত অনুষ্ঠিত হ’ব। উল্লেখ্য যে, যদি এই শৃংখলাত ভাৰত জয়ী হয়, তেতিয়া প্ৰটিয়াছ ভূমিত এয়া হ’ব ভাৰতৰ দ্বিতীয়টো এদিনীয়া শৃংখলা জয়।

[ad_2]


Spread the love

By Admin

Leave a Reply

Your email address will not be published. Required fields are marked *