Spread the love

[ad_1]

জনসাধাৰণৰ জ্বলন্ত সমস্যাসমূহ সমাধানৰ দাবীত চিপিআই (এম) দলে শনিবাৰে বৰপেটা চহৰত অনুষ্ঠিত কৰে বিশাল জনসমাৱেশ ৷ এই জনসমাৱেশত অংশ গ্ৰহণ কৰে বৰ্ষীয়ান ৰাজনৈতিক নেতা তথা সৰভোগৰ প্ৰাক্তন বিধায়ক হেমেন দাস, সৰভোগৰ বৰ্তমান বিধায়ক মনোৰঞ্জন তালুকদাৰ, চিপিআই (এম)ৰ ৰাজ্যিক কমিটিৰ সম্পাদক সুপ্ৰকাশ তালুকদাৰ, চিপিআই (এম)ৰ ৰাজ্যিক সম্পাদক মণ্ডলীৰ সদস্য নয়ন ভূঞাৰ লগতে কেইবা গৰাকী চিপিআই (এম) নেতা ৷

নেতা সকলে নৰেন্দ্ৰ মোডী নেতৃত্বাধীন কেন্দ্ৰীয় চৰকাৰ আৰু ড° হিমন্ত বিশ্ব শৰ্মা নেতৃত্বাধীন ৰাজ্য চৰকাৰৰ বিৰুদ্ধে সোচ্চাৰ হৈ পৰে ৷ ভাষণ প্ৰসংগত ৯৩ বৰ্ষীয় ৰাজনৈতিক নেতা তথা প্ৰাক্তন বিধায়ক হেমেন দাসে কয় যে, কেৱল টকা পইছা আত্মসাৎ কৰিলেই দুৰ্নীতি হোৱা নুবুজায় ৷ নীতি বহিৰ্ভূতভাবে কৰা কাম কাজবোৰো দুৰ্নীতি ৷ মুখ্যমন্ত্ৰী ড° হিমন্ত বিশ্ব শৰ্মাই নীতি বহিৰ্ভূত কাম কাজ কৰি দুৰ্নীতি কৰি আহিছে বুলি কয় হেমেন দাসে ৷

তেওঁ কয় যে, নিজ পত্নীক নীতি বহিৰ্ভূতভাবে খেতি মাটি ক্ৰয় কৰাত সুবিধা কৰি সেই মাটি ঔদ্যোগিক ভূমিলৈ ৰূপান্তৰ কৰি ৰাজসাহাৰ্যৰ বাবে আবন্টন কৰা, নিজৰ সমষ্টিৰ ৫৬ বছৰীয়া লোকক নিযুক্তি দিয়া আদি বহু নীতি বহিৰ্ভূত কাম মুখ্যমন্ত্ৰী ড° হিমন্ত বিশ্ব শৰ্মাই কৰিছে৷ নীতি বহিৰ্ভূত এই কামবোৰো দুৰ্নীতি বুলি কয় হেমেন দাসে ৷ নিৰ্বাচন চমু চাপি অহাৰ বাবে বিজেপি আৰু আৰ এছ এছে এতিয়া মুছলমানপ্ৰীতি দেখুওৱা বুলি কয় হেমেন দাসে ৷

আনহাতে, বৰপেটা জিলাক অংগক্ষত কৰিব বিচৰা চৰকাৰৰ সিদ্ধান্ত সন্দৰ্ভত হেমেন দাসে কয় যে সৰভোগবাসী বৰপেটা জিলাৰ সৈতে থাকিব বিচাৰে ৷ বৰপেটা জিলাক অক্ষুন্ন ৰখাৰ বিৰোধিতা একমাত্ৰ আৰ এছ এছে কৰা বুলি উল্লেখ কৰে হেমেন দাসে ৷ আৰ এছ এছে ষড়যন্ত্ৰ কৰি সৰভোগৰ ৰাইজক বজালী জিলালৈ নিয়াৰ কৌশল ৰচনা কৰা বুলিও উল্লেখ কৰে হেমেন দাসে ৷

ইণ্ডিয়া গঠনেৰে বিজেপিক পৰাস্ত কৰাৰ বাবে সংগ্ৰাম আৰম্ভ হৈছে- মনোৰঞ্জন তালুকদাৰ

কমৰেড কমলা বৰ্মণৰ সভাপতিত্বত অনুষ্ঠিত জনসমাৱেশত সৰভোগৰ বিধায়ক মনোৰঞ্জন তালুকদাৰে ভাষণ প্ৰসংগত কয় যে, সৰ্ব সাধাৰণ ৰাইজক সমস্যাত পেলোৱা বিজেপি চৰকাৰক বিদায় দিয়াৰ লক্ষ্যৰে এই জনসমাৱেশৰ আয়োজন কৰা হৈছে ৷

তেওঁ কয় যে, ২০২৪ ত লোকসভা নিৰ্বাচন ৷ ভাৰতৰ ৰাইজৰ মনত এতিয়া এটাই প্ৰশ্ন- যদিহে ২০২৪ ৰ লোকসভা নিৰ্বাচনত বিজেপিক পৰাজিত কৰিব পৰা নাযায় তেন্তে ভাৰতবৰ্ষক ৰক্ষা কৰিব পৰা নাযাব ৷ সংবিধান আৰু গণতান্ত্ৰিক ব্যৱস্থাক ৰক্ষা কৰিব পৰা নাযাব ৷ সেইবাবেই দেশৰ ২৬ টা ৰাজনৈতিক দল লগ হৈ “ইণ্ডিয়া” গঠন কৰিছে ৷ এই “ইণ্ডিয়া” গঠনেৰে বিজেপিক পৰাস্ত কৰাৰ বাবে সংগ্ৰাম আৰম্ভ হৈছে ৷ সেইবাবেই বিজেপি দল শংকিত হৈছে বুলিও তেওঁ উল্লেখ কৰে ৷

তেওঁ লগতে কয় যে, ২০১৪ ৰ নিৰ্বাচনত নৰেন্দ্ৰ মোডীয়ে ৰাইজক যি সমূহ প্ৰতিশ্ৰুতি দিছিল সেই প্ৰতিশ্ৰুতিবোৰ ৯ বছৰে পূৰণ কৰিব নোৱাৰিলে ৷ বিজেপিৰ মিথ্যাচাৰ ৰাইজে বুজি উঠিছে বাবেই বিজেপিয়ে পুনৰ হিন্দুত্বৰ ৰাজনীতিৰে নিৰ্বাচনত অৱতীৰ্ণ হোৱাৰ প্ৰস্তুতি চলোৱা বুলি তেওঁ কয় ৷

ধৰ্মক লৈ ৰাজনীতি কৰা সকল ধাৰ্মিক নহয়- সুপ্ৰকাশ তালুকদাৰ

বৰপেটা জিলা ক্ৰীড়া সন্থাৰ খেলপথাৰত অনুষ্ঠিত জনসমাৱেশত অংশগ্ৰহণ কৰি চিপিআই (এম)ৰ ৰাজ্যিক কমিটিৰ সম্পাদক সুপ্ৰকাশ তালুকদাৰে কয় যে, ধৰ্মৰ নাম লৈ ৰাজনীতি কৰা সকল ধাৰ্মিক নহয় ৷ তেওঁ কয় যে, মুখ্যমন্ত্ৰী হিমন্ত বিশ্ব শৰ্মাই অসমত আন্দোলন বন্ধ হোৱা বুলি দম্ভালি মাৰিলেও হিমন্ত বিশ্ব শৰ্মাৰ স্বৈৰাচাৰী শাসনৰ বাবেই ঐতিহ্যমণ্ডিত বৰপেটা সত্ৰৰ ডেকা সত্ৰীয়াই আন্দোলন কৰিবলৈ বাধ্য হৈছে ৷

হিমন্ত বিশ্ব শৰ্মাই খিলঞ্জীয়াৰ কাৰণে নহয় নিজ পৰিয়ালৰ বাবে কাম কৰা বুলিও মন্তব্য কৰে সুপ্ৰকাশ তালুকদাৰে ৷ তেওঁ কেন্দ্ৰ আৰু ৰাজ্য চৰকাৰৰ কাম কাজত ৰাইজ অতীষ্ঠ হোৱা বুলি কয় ৷ বিজেপি চৰকাৰে হিন্দু আৰু মুছলমানৰ পৰা বিচ্ছেদ হব ধৰিছে বুলি তেওঁ উল্লেখ কৰে ৷ যাৰ বাবেই বিজেপিয়ে এতিয়া সাম্প্ৰদায়িক কাম কাজ বৃ্দ্ধি কৰিছে বুলি তেওঁ অভিযোগ কৰে ৷

চিপিআই (এম)ৰ বৰপেটা জিলা কমিটিৰ সম্পাদক আজিজুৰ ৰহমানে উদ্দেশ্য ব্যাখ্যা কৰা জনসমাৱেশত চিপিআই (এম)ৰ ৰাজ্যিক সম্পাদক মণ্ডলীৰ সদস্য নয়ন ভূঞাই কয় যে, এতিয়া অসমত চৰকাৰ চলা নাই চলিছে হিমন্তৰ দাদাগিৰি৷ হিমন্ত বিশ্ব শৰ্মাৰ দিনত সকলো ক্ষেত্ৰতে দুৰ্নীতি হোৱাৰ লগতে চিণ্ডিকেটৰাজ আৰু দালালৰাজ চলা বুলি তেওঁ কয় ৷

বিজেপি চৰকাৰৰ দিনত ৰাইজ ভয়ংকৰ বিপদত পৰা বুলি উল্লেখ কৰি এই বিপদৰ পৰা ৰক্ষা পাবলৈ হলে বিজেপি চৰকাৰক চিৰ বিদায় দিব লাগিব বুলি উল্লেখ কৰে নয়ন ভূঞাই ৷ এই জনসমাৱেশত জিলাখনৰ বিভিন্ন প্ৰান্তৰ প্ৰায় তিনি সহস্ৰাধিক চিপিআই (এম) কৰ্মী, সমৰ্থক আৰু ৰাইজ উপস্থিত থাকে ৷

[ad_2]


Spread the love

By Admin

Leave a Reply

Your email address will not be published. Required fields are marked *