Spread the love

[ad_1]

অভিলেখ সৃষ্টিৰে আজি নৱী মুম্বাইত ইংলেণ্ডক বিধ্বস্ত কৰিছে ভাৰতে। ইংলেণ্ডৰ বিপক্ষে টেষ্ট শৃংখলাৰ একমাত্ৰ মেচখনত হৰমনপ্ৰীত কৌৰ নেতৃত্বাধীন ভাৰতীয় মহিলা ক্ৰিকেট দলটোৱে ৩৪৭ ৰাণৰ বৃহৎ জয়েৰে মহিলা ক্ৰিকেটৰ ইতিহাসত নতুন অভিলেখ গঢ়ি তোলে।

দিপ্তী শৰ্মাৰ স্পিন ঘূৰ্ণী তথা অলৰাউণ্ড প্ৰদৰ্শনৰ জৰিয়তে ইংলেণ্ডক এই বৃহৎ ব্যৱধানত পৰাস্ত কৰি ভাৰতীয় দলে মহিলা টেষ্ট ক্ৰিকেটৰ ইতিহাসত সৰ্বাধিক ৰাণৰ ক্ষেত্ৰত সৰ্বাধিক ব্যৱধানত জয়ৰ নতুন অভিলেখ স্থাপন কৰে।

ইয়াৰ পূৰ্বে সৰ্ববৃহৎ জয়ৰ ৰেকৰ্ড আছিল শ্ৰীলংকাৰ নামত। ১৯৯৮ চনত কলম্বোত পাকিস্তানৰ বিৰুদ্ধে শ্ৰীলংকাই ৩০৯ ৰাণৰ ব্যৱধানত জয়লাভ কৰিছিল।শ্ৰীলংকাৰ নামত থকা এই ২৫ বছৰীয়া অভিলেখ আজি ভাৰতে ভংগ কৰে।

লক্ষণীয়ভাৱে ঘৰৰ মাটিত ইংলেণ্ডৰ বিৰুদ্ধে ভাৰতৰ টেষ্টত এয়া প্ৰথমটো জয়। বৃহস্পতিবাৰৰ পৰা আৰম্ভ হোৱা মেচখনত ভাৰতে আজি তৃতীয় দিনাই বিধ্বস্ত কৰে ইংলেণ্ডক। ভাৰতে বান্ধি দিয়া ৪৭৯ ৰাণৰ বৃহৎ লক্ষ্য অনুসৰণ কৰি ১৩১ ৰাণতে স্তব্ধ হয় ইংলেণ্ড।

মেচখনত ইংলেণ্ডৰ বিপৰ্যয়ৰ কাৰণ হৈ পৰা দিপ্তী শৰ্মাই ৩২ ৰাণত ৪টা, পূজা ৱাষ্ট্ৰেকাৰে ২৩ ৰাণত ৩টা উইকেট দখল কৰে। ৰাজেশ্বৰী গাইকোৱাড আৰু ৰেণুকা ঠাকুৰ সিঙে লাভ কৰে ক্ৰমে দুটা আৰু এটা উইকেট। উল্লেখ্য যে, দিপ্তীয়ে প্ৰথম ইনিংছতো মাত্ৰ ৭ ৰাণত ৫ টা উইকেট দখল কৰিছিল।

ভাৰতে প্ৰথমে বেটিং কৰি চাৰিগৰাকীকৈ বেটাৰৰ অৰ্ধশতকৰ সহায়ত থিয় কৰাইছিল ৪২৮ ৰাণৰ স্ক’ৰ। শুভা সতীশে ৬৯, জেমিমা ৰড্ৰিগুৱেজে ৬৮, য়াস্তিকা ভাটিয়াই ৬৬ আৰু দিপ্তী শৰ্মাই ৬৭ ৰাণ কৰাৰ লগতে অধিনায়ক হৰমনপ্ৰীতে খেলিছিল ৪৯ ৰাণৰ ইনিংছ। স্নেহ ৰাণাৰ বেটৰ পৰা আহিছিল ৩০ ৰাণ।

ইংলেণ্ডৰ ল’ৰেণ বেল আৰু একালষ্ট’নে তিনিটাকৈ উইকেট লাভ কৰিছিল। ইয়াৰ প্ৰত্যুত্তৰত দিপ্তীৰ বিধ্বংসী বলিঙৰ সমুহত দিশহাৰা ইংলেণ্ডে ১৩৬ ৰাণতে ইনিংছ সামৰে। দললৈ সৰ্বাধিক ৫৯ ৰাণৰ অৱদান আগবঢ়ায় নেট চিভাৰ-ব্ৰাণ্টে। প্ৰায় ব্যৰ্থ হয় আনসকল বেটাৰ।

দিপ্তীয়ে ৫ টা উইকেট দখল কৰাৰ বিপৰীতে স্নেহ ৰাণাই দুটা আৰু ৰেণুকা সিং, পূজা ৱাষ্ট্ৰেকাৰে এটাকৈ উইকেট লাভ কৰে। ইংলেণ্ডে ফ’ল অন কৰিলেও পিছে ভাৰতে পুনৰ বেটিঙৰ সিদ্ধান্ত লয় আৰু ৬ উইকেটত ১৮৬ ৰাণৰ স্ক’ৰত ইনিংছ ঘোষণা কৰে।

সৰ্বাধিক ৪৪ ৰাণত অপৰাজিত হৈ ৰয় হৰমনপ্ৰীত। অপেনাৰ শ্বেফালী বাৰ্মাই ৩৩, স্মৃতি মান্ধানাই ২৬, জেমিমা ৰড্ৰিগুৱেজে ২৭, দিপ্তী শৰ্মাই ২০ ৰাণৰ অৱদান আগবঢ়ায়। হৰমনপ্ৰীতৰ সৈতে ক্ৰীজত ১৭ ৰাণ কৰি অপৰাজিত হৈ ৰয় পূজা ৱাষ্ট্ৰেকাৰ।

ইফালে ৪৭৯ ৰাণৰ বৃহৎ লক্ষ্য আগত লৈ ইংলেণ্ডে সাৱধানে ইনিংছ আৰম্ভ কৰে যদিও ২৭ ৰাণত প্ৰথমটো উইকেট পতনৰ পিছত বেটিং লাইন আপত ক্ৰমশ: খহনীয়াৰ সৃষ্টি হয় আৰু ১৩১ ৰাণত সকলো উইকেট হেৰুৱাই পৰাজয় স্বীকাৰ কৰে।

দ্বিতীয় ইনিংছত ইনিংছত সৰ্বাধিক ৰাণ সংগ্ৰহকাৰীৰ ৰূপত অধিনায়ক হেথাৰ নাইটে কৰে ২১ ৰাণ। চাৰলট ডীনে ২০ ৰাণ কৰি অপৰাজিত হৈ ৰয়। মেচখনত মুঠ ৯ টা উইকেট আৰু ৮৭ ৰাণ সংগ্ৰহ কৰা দিপ্তী শৰ্মা মেচৰ শ্ৰেষ্ঠ বিবেচিত হয়।

[ad_2]


Spread the love

By Admin

Leave a Reply

Your email address will not be published. Required fields are marked *